Psa 12 | Geez | STEP | እስከ ፡ ማእዜኑ ፡ እግዚኦ ፡ ትረስዐኒ ፡ ለግሙራ ፡ እስከ ፡ ማእዜኑ ፡ ትመይጥ ፡ ገጸከ ፡ እምኔየ ።

Psalms 12

ፍጻሜ ፡ መዝሙር ፡ ዘዳዊት ።
1 እስከ ፡ ማእዜኑ ፡ እግዚኦ ፡ ትረስዐኒ ፡ ለግሙራ ፡
እስከ ፡ ማእዜኑ ፡ ትመይጥ ፡ ገጸከ ፡ እምኔየ ።
2 እስከ ፡ ማእዜኑ ፡ ኣነብር ፡ ሐዘነ ፡ ውስተ ፡ ነፍስየ ፡
ወትጼዕረኒ ፡ ልብየ ፡ ኵሎ ፡ አሚረ ፤
3 እስከ ፡ ማእዜኑ ፡ ይትዔበዩ ፡ ጸላእትየ ፡ ላዕሌየ ።
ነጽረኒ ፡ ወስምዐኒ ፡ እግዚኦ ፡ አምላኪየ ፤
4 አብርሆን ፡ ለአዕይንትየ ፡ ከመ ፡ ኢይኑማ ፡ ለመዊት ።
ወከመ ፡ ኢይበሉኒ ፡ ጸላእትየ ፡ ሞእናሁ ፤
5 ወእለሰ ፡ ይሣቅዩኒ ፡ ይትፌሥሑ ፡ ለእመ ፡ ተሀወኩ ።
ወአንሰ ፡ በምሕረትከ ፡ ተወከልኩ ፡
6 ይትፌሥሐኒ ፡ ልብየ ፡ በአድኅኖትከ ፤
እሴብሖ ፡ ለእግዚአብሔር፡ ዘረድአኒ ፡
ወእዜምር ፡ ለስመ ፡ እግዚአብሔር፡ ልዑል ።